Recent Posts Widget


වැලිකඩ රිමාන්ඩ් බන්ධනාගාරයේ රැඳවියෙකු කොවිඩ් 19 ආසාදිතයෙකු වශයෙන් තවහුරු කර ගෙන ඇති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ මහතා පවසයි.

මෙම රැඳවියා කන්දකාඩුවෙහි පිහිටි මත්ද්‍රව්‍යයට ඇබ්බැහිවුවන් පුනරුත්ථාපනය කිරීමේ මධ්‍යස්ථානයේ සිට ජුනි මස 27 වන දින වැලිකඩ රිමාන්ඩ් බන්ධනාගාරය වෙත මාරු කර එවන ලද රැඳවියෙකි.

මෙම හඳුනාගත් රෝගියා සම්බන්ධයෙන් සහ අනෙකුත් ආශ්‍රිතයන් පීසීආර් පරීක්ෂණ සහ නිරෝධායන කටයුතු සිදු කරමින් පවතින අතර, මෙම පරීක්ෂණ සඳහා රිමාන්ඩ් බන්ධනාගාර රැඳවියන් සහ බන්ධනාගාර නිලධාරීන් ද බඳුන් කරනු ලබන බව රජයේ ප්‍රවෘත්ති දෙපාර්තමේන්තුවේ අධ්‍යක්ෂ ජනරාල් නාලක කලුවැව මහතා නිකුත් කළ නිවේදනයක දැක්වේ.

එම නිවේදනය පහතින් දැක්වේ.


2011 ලෝක කුසලාන ක්‍රිකට් අවසන් මහා තරඟය පාවා දුන්නේ යැයි එවකට හිටපු ක්‍රීඩා ඇමැති මහින්දානන්ද අලුත්ගමගේ මහතා විසින් කළ ප්‍රකාශය සම්බන්ධයෙන් පරීක්ෂණයක් ආරම්භ කරනැයි ක්‍රීඩා අමාත්‍යාංශය වෙත පැමිණිල්ලක් භාර දී තිබේ.

මෙම පැමිණිල්ල භාර දී ඇත්තේ සමාජවාදී තරුණ සංගමය හා සේවු ද ස්පෝට් සංවිධානය එක්වයි.

ක්‍රීඩාවන් සම්බන්ධයෙන් අසත්‍ය චෝදනා ඉදිරිපත් කරන අයට නීති මගින් කටයුතු කිරීමේ අවස්ථාව පසුගිය රජය විසින් සම්මත කර ඇති නව පනතක් අනුව ලැබී ඇත.

ඒ අනුව මහින්දානන්ද අලුත්ගමගේ මහතා විසින් එල්ල කරන ලද චෝදනාව සම්බන්ධයෙන් කිසිදු තොරතුරක් හෙළි නොවීම මත ඔහුට එරෙහිව පරීක්ෂණ කරන්නැයි මෙම පැමිණිල්ල මගින් ඉල්ලා තිබේ.


කිලිනොච්චිය ඉයක්කච්චි ප්‍රදේශයේ නිවසක්තුල තිබී දේශීය නිශ්පාදිත බෝම්බ 3 ක් සමගින් පුපුරණදුව්‍ය හා කලුකොටි සමරණ කොඩියක් ඇතුලු උපකරණ සමගින් කාන්තාවක් ඊයේ (05) රාත්‍රියේ ත්‍රස්ත විමර්ශන නිලධාරීන් හා පලෙයි පොලීසිය විසින් අත්අඩංගුවට ගෙන ඇත.

අදාල කාන්තාව සිටි නිවසේ මීට පෙර දිනකදී දේශීය බෝම්බයක් සෑදීමට ගත් උත්සහයකදී එය පුපුරා යාමෙන් ඇයගේ ස්වාමිපුරුෂයා බරපතල තුවාල ලබා රෝහල්ගත කොට ඇති අතරඒ පිළිබඳව වැඩි දුර පරික්ෂා කිරීමේදී නිවසේ සඟවා තිබූ අදාල බෝම්බ හා පුපුරණද්‍රව්‍ය තොගය සොයාගනු ලැබීය.

එහිදී නිවසේ තිබී දේශීය නිශ්පාදිත බෝම්බ 3ක්, පුපුරණද්‍රව්‍ය තොගයක්, කලුකොටි දිනය සමරමු යනුවෙන් කොඩියක්, කලුකොටි සාමාජිකයෙකුගේ ඡායාරූපයක් ආදි වහයෙන් සොයාගෙන ඇත.

අනතුරුව නිවසේ සිටි 43 හැවිරිදි කාන්තාවද අත්අඩංගුවට ගෙන ඇති අතර ඇය ප්‍රදේශයේ පාසලක ගුරුවරියක් වශයෙන්ද සේවය කරන බවට තොරතුරු අනාවරණය කොට ගෙන ඇත.

කෙසේ වෙතත් බෝම්බ පිපිරුමෙන් බරපතල තුවාල ලබා රෝහල්ගතව සිටින සාමාජිකයා හිටපු කොටි සාමාජිකයෙකු බවටද තොරතුරු ලැබී ඇති අතර අදාල බෝමබ නිශ්පාදනය කිරීමට හේතුව සෙවීම සඳහා ත්‍රස්ත විමර්ශන නිලධාරීන් විසින් මේ වන විටත් පරික්ෂණයක් අරඹා ඇත.

සොයාගත් බෝම්බම හා පුපුරණද්‍රව්‍ය අධිකරණ නියෝගයකට අනුව නිශ්ක්‍රී කිරීම සඳහා පොලීසිය පොලිස් විශේෂ කාර්ය බලකාය සහයද ලබාගන්නා බවට පලෙයි පොලීසිය වැඩි දුරටත් පැවසීය.


කුඩු ජාවාරමකු වන මර්වින් ජානාගේ කුඩු සල්ලි රුපියල් ලක්ෂ 1400ක් තැන්පත් කර තිබූ යාචකයකුගේ බැංකු ගිණුමක් ගල්කිස්ස ජ්‍යෙෂ්ඨ පොලිස් අධිකාරී කාර්යාලය සිදුකළ විමර්ශනයකදී සොයාගෙන තිබෙනවා.

මෙම යාචකයාගේ නමට අත්තිඩියේ පෞද්ගලික බැංකුවක ගිණුමක් විවෘත කර එහි බැංකු පොත හා කාඩ්පත මර්වින් ජානාගේ බිරිඳ සන්තකයේ තබාගෙන ඇති බව වාර්තා වනවා.

පසුගිය වසරේ ජූලි 15දා සිට මාස 11ක් තුළ රුපියල් ලක්ෂ 1400ක් තැන්පත් කර තිබෙනවා. මර්වින් ජානා දැනට බන්ධනාගාරගතව සිටී.

ශ්‍රී ලංකා ක්‍රිකට් කණ්ඩායමේ මුල් පෙල පිතිකරු කුසල් මෙන්ඩිස් පොලීසිය විසින් අත්අඩංගුවට ගෙන තිබේ.

පානදුර, හොරේතුඩුව ප්‍රදේශයේදී ඔහු විසින් පදවන ලද වාහනයක හැපී පුද්ගලයෙකු මියයාම සම්බන්ධයෙන් මෙම අත්අඩංගුවට ගැනීම කර ඇත.

මිය ගොස් අති පුද්ගලයා වයස අවුරුදු 64ක අයෙකි.

අනතුර සිදු වීමෙන් පසු කුසල් මෙන්ඩිස් පොලිසියට භාරවීමෙන් පසු අත්අඩංගුවට ගෙන ඇත.

සම්පත් බැංකුවේ දෙහිවල ශාඛාවට ඇතුළු වීමට උත්සාහ දැරූ මුස්ලිම් කාන්තාවකගේ අනන්‍යතාවය තහවුරු කර ගැනීම සම්බන්ධයෙන් ඇති වූ ගැටළුවකට අදාළ වීඩියෝපටයක් සමාජ ජාලා තුළ විශේෂ අවධානයකට ලක් විය.

ජූලි 02 බ්‍රහස්පතින්දා දින සිදුවී ඇති අදාළ සිදු වීමෙන් පසු මේ වන විට සම්පත් බැංකුවට එරෙහිව විශාල මෙහෙයුමක් දියත්ව ඇති ආකාරය ද සමාජ මාධ්‍ය හරහා නිරීක්ෂණය වේ.

මෙම චිත්‍රපට නැරබීම සදහා Youtube (Data Free) පැකේජ ලබාගෙන ඇති අයට කිසිදු Data වැය වීමක් සිදු නොවේ.


හෝමාගම, පිටිපන ප්‍රදේශයේ දී තවත් අවි ආයුද සමග කාන්තාවක් අත්අඩංගුවට ගෙන තිබේ.

2020.06.29 වන දින ජයවර්ධනපුර පොලිස් විශේෂ කාර්ය බලකා නිලධාරීන් විසින් ලද තොරතුරක් මත හෝමාගම පිටිපන නගරයේ පිහිටි පුද්ගලික සමාගමකට අයත් තට්ටු 5කින් යුත් ගොඩනැඟිල්ලක පහත මහලේ ව්‍යාපාරික භාණ්ඩ ගබඩාවක සඟවා තිබු ටී 56 ගිනි අවි 11 ක් හා ටී 81 වර්ගයේ ගිනි අවියක් සමග ගොඩනැඟිල්ලේ අයිතිකරු හා තවත් සැකකරුවෙක් අත්අඩංගුවට ගනු ලැබීය.

එම ගොඩනැඟිල්ලේ අයිතිකරු විසින් අනියම් සම්බන්ධතාවයක් පැවැත් වු බවට සැක කරන කාන්තාවකගේ සිල්වස්ටන් වත්ත, 4 වන පටුමග, පිටිපන උතුර, හෝමාගම පිහිටි නිවස රාජ්‍ය බුද්ධි සේවා නිලධාරීන් විසින් ලබා දෙන ලද තොරතුරකට අනුව අද (01) හෝමාගම පොලිස් ස්ථානයේ නිලධාරීන් කණ්ඩායමක් විසින් පරික්ෂාවට ලක් කර ඇත.

එම නිවසේ රහස් කුටියක තිබී අවි ආයුධ හා පුපුරණ ද්‍රව්‍ය සොයා ගෙන තිබේ.

එහිදී බොඩි ආමර් 2ක්, රිපීටර් ෂොට් ගන් එකක් හා සජීව උණ්ඩ 4ක්, හෑන්ඩ් ග්‍රෙනේඩ් 7ක් හා හඳුනා නොගත් උණ්ඩ 4 ක් අත්අඩංගුවට ගෙන ඇත.

සිද්ධිය සම්බන්ධයෙන් නිවසේ කාන්තාව අත්අඩංගුවට ගෙන ඇති අතර, හෝමාගම පොලීසිය විසින් වැඩිදුර විමර්ශන පවත්වයි.

නීතිවිරෝධී ලෙස ඇත් දළ දෙකක් ළග තබාගෙන සිටි කතරගම මහ දේවාලයේ කපු මහතෙකු අත්අඩංගුවට ගැනීමට අම්බලන්තොට පොලිස් විශේෂ කාර්ය බළකා නිලධාරීන් හා කතරගම වනජීවී කාර්යාලයේ නිලධාරීන් සමත් වී තිබෙනවා.

හම්බන්තොට නාවික හමුදා කඳවුරේ බුද්ධි අංශ නිලධාරීන්ගේ බුද්ධි තොරතුරකට අනුව ඊයේ (28) සවස මෙම වැටලීම කර තිබෙන අතර කතරගම නගරය ආසන්නයේ ඇති අදාළ කපුමහතාගේ නිවස පරික්ෂා කිරීමේදී සෙන්ටිමීටර් 94 ක් හා සෙන්ටිමීටර් 101.5 දිග මෙම ඇත් දල යුගල සොයා ගත් බව වනජීවී නිලධාරීන් පවසා තිබුණා.

එමෙන්ම අදාළ ඇත් දල යුගල ළග තබා ගැනීම සදහා සකස්කර තිබු ව්‍යාජ සහතිකපත් කීපයක්ද වනජිවි නිලධාරීන්ගේ භාරයට ගෙන ඇති අතර මේ සම්බන්ධයෙන් කතරගම වනජීවී නිලධාරීන් වැඩිදුර පරීක්ෂණ සිදුකරනු ලබනවා.


2011 ලෝක කුසලාන ක‍්‍රිකට් අවසන් මහ තරගය පාවා දුන්නේ යයි එල්ල වන චෝදනා සම්බන්දයෙන් සිදු කරන පරීක්‍ෂණය සදහා ශ‍්‍රී ලංකා කණ්ඩායමේ ආරම්භක පිතිකරුවෙකු වන උපුල් තරංග කැදවා ඇත.

හෙට පෙරවරුවේ ක‍්‍රීඩා අමාත්‍යංශයේ විමර්ශණ ඒකකය හමුවට පැමිණෙන ලෙස ඔහුට දැනුම් දී තිබේ.

මේ අතර 2011 වසරේදී ක‍්‍රිකට් තේරීම් කමිටු සභාපති අරවින්ද ද සිල්වාගෙන් අද දිනයේ ප‍්‍රකාශයක් ලබා ගත් අතර පැය 06 ක පමණ කාලයක් ඔහුගෙන් ප‍්‍රකාශ ලබා ගන්නා ලදී.

හෙරොයින් ජාවාරමේ නිරතවීමේ චෝදනාව මත අත්අඩංගුවට ගත් පොලිස් මත්ද්‍රව්‍යනාශක කාර්යාංශයේ නිලධාරින් සතුව තිබි රුපියල් ලක්ෂ 311 කට ආසන්න මුදලක් මේ වන විට සොයාගෙන ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි ජාලිය සේනාරත්න මහතා ප්‍රකාශ කරනවා.

ඒ අනුව මත්ද්‍රව්‍ය ජාවාරමේ නිරතවු පොලිස් මත්ද්‍රව්‍යනාශක කාර්යාංශයේ නිලධාරින් සිව්දෙනෙකු සහ තවත් පුද්ගලයෙකු මේ වන විට අපරාධ පරීක්ෂණ දෙපාර්තමේන්තුව විසින් රඳවාගෙන ප්‍රශ්න කරමින් සිටින බවයි ඔහු සඳහන් කළේ.

ත්‍රස්තවාදය වැළැක්වීමේ තාවකාලික විධි විධාන පනත යටතේ අපරාධ පරීක්ෂණ දෙපාර්තමේන්තුව විසින් ඔවුන් පස්දෙනා රඳවාගෙන ප්‍රශ්න කරමින් සිටින බවයි ඔහු වැඩිදුරටත් සඳහන් කළේ.

එහිදී සිදුකළ ප්‍රශ්න කිරීම්වලදී අනාවරණය වී ඇත්තේ අත්අඩංගුවේ සිටින නිලධාරීන් මත්ද්‍රව්‍ය ප්‍රවාහනය කිරිම සහ බෙදාහැරීම් කටයුතු සඳහා ජාවාරම්කරුවන්ට උදව්කර ඇති බවයි.

ඔවුන් මේ වන විට විශාල මුදලක් උපයා ඇති අතර විශාල දේපළ ප්‍රමාණයක්ද මිලදි ගෙන ඇති බව පරීක්ෂණවලින් වැඩිදුරටත් අනාවරණය වී තිබෙනවා.


ඉහළ රසදිය ප්‍රමාණයක් අඩංගු නිෂ්පාදන ලෙස පාරිභෝගික කටයුතු පිළිබඳ අධිකාරිය විසින් හඳුනා ගනු ලැබ ඇති ක්‍රීම් වර්ග

ඡායාරූප ශීර්ෂ වැකිය,
ඉහළ රසදිය ප්‍රමාණයක් අඩංගු නිෂ්පාදන ලෙස පාරිභෝගික කටයුතු පිළිබඳ අධිකාරිය විසින් හඳුනා ගනු ලැබ ඇති ක්‍රීම් වර්ග
සම පැහැ ගැන්වීම සඳහා ශ්‍රී ලංකාවේ භාවිත කෙරෙන ඇතැම් ක්‍රීම් වර්ගවල [whitening Cream] සම්මත ප්‍රමාණයට වඩා පනස් එක්දහස් ගුණයක් රසදිය අඩංගු බව පර්යේෂණයකින් අනාවරණය වී ඇතැයි පාරිභෝගික කටයුතු පිළිබඳ අධිකාරිය පවසයි.
එම අධිකාරියේ නියෝජ්‍ය අධ්‍යක්ෂිකා සමන්තා කරුණාරත්න පෙන්වා දෙන පරිදි කාර්මික තාක්ෂණ ආයතනයේදී [ITI] නියැදි 16ක් පරීක්ෂා කර ඇති අතර එම ක්‍රීම් වර්ගවල ඉතා ඉහළ රසදිය ප්‍රමාණයක් අඩංගු වී තිබේ. කාර්මික තාක්ෂණ ආයතනය, රජයේ ආයතනයකි.
නිසි පටිපාටියකින් තොරව එවැනි ක්‍රීම් වර්ග බොහොමයක් ශ්‍රී ලංකාවට ගෙන්වා ඇත්තේ, පාකිස්තානයෙන් බවත් පාරිභෝගික කටයුතු පිළිබඳ අධිකාරිය පෙන්වා දෙයි.
2018 මැයි 03 වන දා නිකුත් කෙරුණු අංක 2069/37 දරන අතිවිශේෂ ගැසට් නිවේදනයට අනුව සමේ අලේප කරන්නා වූ සියලු ම ක්‍රීම් සහ දියර වර්ගවල [Lotions] බැර ලෝහ අඩංගු කළ හැකි උපරිම සීමාවන් දක්වා ඇත.
ඒ අනුව රසදිය [Mercury] පැවතිය හැක්කේ කිලෝග්‍රෑම් එකකට මිලිග්‍රෑම් එකකි (1Kg -1mg). එහෙත් පරීක්ෂාවට ලක් කෙරුණු නියැදි 10/16ක අන්තර්ගත රසදිය ප්‍රමාණය මිලිග්‍රෑම් එකළොස් දහස ඉක්මවා තිබේ.

කිලෝ ග්‍රෑම් 1 අඩංගු රසදිය මිලි ග්‍රෑම් ප්‍රමාණය

ඡායාරූප ශීර්ෂ වැකිය,
කිලෝ ග්‍රෑම් 1 අඩංගු රසදිය මිලි ග්‍රෑම් ප්‍රමාණය
ශ්‍රී ලංකාවේ ජනප්‍රිය වෙළෙඳ නාම බවට පත්ව ඇති ඉතා ඉහළ රසදිය ප්‍රමාණයක් අඩංගු ක්‍රීම් සහ දියර පිළිබඳ විශ්ලේෂණයේදී පාරිභෝගික කටයුතු පිළිබඳ අධිකාරිය සුවිශේෂී තත්ත්වයක් හඳුනාගෙන තිබේ. එනම් ඒවායේ නිෂ්පාදිත රට, කල් ඉකුත් වීමේ දිනය හෝ අන්තර්ගත රසායන ද්‍රව්‍ය පිළිබඳ කිසිදු සටහනක් නොමැති වීමය.
අදාළ ක්‍රීම් වර්ග නිෂ්පාදනය කරන ලද සමාගම්වලින් ඒ සම්බන්ධයෙන් ප්‍රතිචාරය ලබා ගැනීමට උත්සහ කළ ද දවටන මත නිෂ්පාදිත සමාගමේ විස්තර අඩංගු නොවන බැවින් ඔවුන් සම්බන්ධ කර ගැනීමට මගක් නොමැත.
සාක්ෂරතාව ඉතා ඉහළ මට්ටමක පවතින ශ්‍රී ලංකාව වැනි රටක භාණ්ඩ තෝරා ගැනීමේදී පාරිභෝගිකයන් ඒවායේ ගුණාත්මකභාවය සම්බන්ධ මූලික කරුණු කෙරෙහි අවධානය යොමු නොකිරීම කනගාටුදායක තත්ත්වයක් බව පාරිභෝගික කටයුතු පිළිබඳ අධිකාරිය පෙන්වා දෙයි.
"වැඩි වශයෙන්ම" රසදිය අඩංගු ක්‍රීම් වර්ග

පාරිභෝගික කටයුතු පිළිබඳ අධිකාරියේ නියෝජ්‍ය අධ්‍යක්ෂිකා සමන්තා කරුණාරත්න

ඡායාරූප ශීර්ෂ වැකිය,
"කිසි ම උප්පැන්නයක් නැති ලයිලා [Layla], නූහා [`Nuha], ගෝරි [Goree] සහ ගෝල්ඩන් පර්ල් [Golden Pearl] යන නිෂ්පාදනවලත් ඉතා ඉහළ රසදිය ප්‍රමාණයක් තිබුණා"
ශ්‍රී ලංකාවෙන් සොයා ගත් වැඩි ම රසදිය ප්‍රමාණයක් අන්තගත වන ක්‍රීම් වර්ග ගැන පාරිභෝගික කටයුතු පිළිබඳ අධිකාරියේ නියෝජ්‍ය අධ්‍යක්ෂිකා සමන්තා කරුණාරත්න මෙලෙස විස්තර කළාය.
''අපේ පරීක්ෂණවලදී හෙළි වුණා මාලිකා [Malika] කියන නිෂ්පාදනයක් ගැන. ඒකෙ රසදිය තිබුණා 51,752ක්. මම ලෝක සෞඛ්‍ය සංවිධානයේ වාර්තා අන්තර්ජාලයෙන් පරික්ෂා කළා. එක වාර්තාවක තිබුණා ලෝකයේ හමුවුණු වැඩි ම නිෂ්පාදනයේ තිබුණෙත් රසදිය තිස් දාස් ගාණක් කියලා. කිසි ම උප්පැන්නයක් නැති ලයිලා [Layla], නූහා [`Nuha], ගෝරි [Goree] සහ ගෝල්ඩන් පර්ල් [Golden Pearl] යන නිෂ්පාදනවලත් ඉතා ඉහළ රසදිය ප්‍රමාණයක් තිබුණා,'' යනුවෙන් ඇය කියා සිටියේ බීබීසී සිංහල සේවය වෙත අදහස් දක්වමිනි.

සමේ ආලේප කරන ප්‍රමිතියෙන් තොර ක්‍රීම් සහ දියර වර්ග නිසා අසාත්මිකතා, දරුණු රෝගාබාධ මෙන් ම ජීවිත හානි පවා ශ්‍රී ලංකාවෙන් වාර්තා වී ඇත.
සම පැහැපත් කර ගැනීමේ අරමුණින් භාවිත කරන ආලේපනවල ප්‍රමිතිය කෙරෙහි කාන්තාවන් විශේෂ අවධානයක් යොමු කළ යුතු බව චර්ම රෝග පිළිබඳ විශේෂඥ වෛද්‍ය ශ්‍රියානි සමරවීර පෙන්වා දෙයි.
ඇය පවසන පරිදි රුව පැහැපත් කර ගැනීමේ අරමුණින් භාවිත කරන ආලේපන නිසා රසදිය ශරීරගත වන ආකාර දෙකකි.
  • සම හරහා
  • ස්වසන මාර්ගය ඔස්සේ

දරුවන්ගේ "මොළයට බලපෑම්"


චර්ම රෝග පිළිබඳ විශේෂඥ වෛද්‍ය ශ්‍රියානි සමරවීර

ඡායාරූප ශීර්ෂ වැකිය,
චර්ම රෝග පිළිබඳ විශේෂඥ වෛද්‍ය ශ්‍රියානි සමරවීර
යම් කාන්තාවක් රසදිය අඩංගු ආලේපන භාවිත කරන්නේ නම් එහි හානිය ඇයට පමණක් නොව සැමියා සහ දරුවන්ට ද එක සේ බලපාන බව චර්ම රෝග පිළිබඳ විශේෂඥ වෛද්‍ය ශ්‍රියානි සමරවීර අවධාරණය කරයි.
මව්වරුන් රසදිය අඩංගු ආලේපන භාවිත කිරීම, විශේෂයෙන් කුඩා දරුවන්ගේ මොළයේ වර්ධනය අඩු වීමට හේතු වන බව බොහෝ දෙනා නොදන්නා කරුණක් බව ද ඇය පෙන්වා දෙයි.
විශේෂඥ වෛද්‍යවරිය පෙන්වා දෙන පරිදි රසදිය ශරීරගත වීම නිසා ඇති විය හැකි සෞඛ්‍ය ගැටලු:
  • වකුගඩු රෝග
  • ස්නායු ආබාධ
  • නොරුස්සන ගතිය
  • සිහිමද ගතිය
  • සමේ දද සහ කැළැල් ඇති වීම
  • සම දුර්වර්ණ වීම
  • ප්‍රතිශක්තිකරණය අඩු වීම නිසා පහසුවෙන් බැක්ටීරියා හා අසාදනවලට ලක්වීම
  • කන් ඇසීම අඩුවීම
  • ඇස් පෙනීම අඩු වීම
පාසල්, විශ්වවිද්‍යාල සහ විවාහවන වයසේ තරුණියන්
පාරිභෝගික කටයුතු පිළිබඳ අධිකාරියේ වාර්තාවලට අනුව ශ්‍රී ලංකාවේ කාන්තාවන් අතර සම පැහැපත් කර ගැනීම සඳහා ක්‍රීම් වර්ග භාවිතය ඉතා ඉහළ මට්ටමක පවතී.
සෞඛ්‍ය බලධාරීන් පවසන පරිදි පාසල් ශිෂ්‍යාවන් සහ විශ්වවිද්‍යාල ඇතුළු උසස් අධ්‍යාපනය හදාරන ශිෂ්‍යාවන් එවැනි ක්‍රීම් වර්ග භාවිතයට වැඩි නැඹුරුවක් දැක්වීම මෑත කාලයේ දක්නට ලැබෙන ප්‍රවණතාවකි.
එමෙන් ම විවාහ දිනය ආසන්න වන විට සම පැහැපත් කර ගැනීමේ අරමුණින් කාන්තාවෝ මෙවැනි ක්‍රීම් වර්ග භාවිතය කෙරෙහි යොමු වෙති. විවාහය වෙනුවෙන් එවැනි ක්‍රීම් වර්ග කෙරෙහි යොමු වන පුරුෂයන් ද නැතුවා නොවේ.
විවාහ දිනයට පෙර සම පැහැ ගැන්වීමේ ක්‍රීම් භාවිත කිරීම නිසා සෞඛ්‍ය ගැටලු මතු වූ කාන්තාවක බීබීසී සිංහල සේවය වෙත සිය අත්දැකීම පැවසුවේ මෙලෙසය.
"මම වෙඩින් එකට මාස දෙකකට විතර කලින් ෆේෂල් එකක් කර ගන්න ගියා. සුදු වෙන්න ගිහින් අන්තිමේදී මට සිද්ධ වුණේ සුදු මැලි වෙන්න."
ආලේපනය හේතුවෙන් ඇති වූ දරුණු ආසාත්මිකතාවක් නිසා තම මුහුණ "විරූපී" වූ ආකාරය ඇය සිහිපත් කළාය.
ඇය සිය නම හෙළි කිරීමට අකමැති වූ අතර භාවිත කරන ලද ක්‍රීම් වර්ගය සම්බන්ධයෙන් ඇයට කිසිදු අවබෝධයක් නොතිබිණි.
ඉහත කී තරුණියගේ විවාහ උත්සවය පවත්වා මේ වන විට වසරක කාලයක් ගතව තිබේ. මුහුණ පැහැපත් කර ගැනීමට අලේප කළ ක්‍රීම් නිසා මුහුණේ ඇති වූ කළු පැහැති ලප නැති කර ගැනීම සඳහා මේ වන තුරුත් ඇය ප්‍රතිකාර ලබන්නීය.

අවධානය යොමු කළ යුතු ආලේපන සහ දියර වර්ග

පාරිභෝගික සේවා අධිකාරිය පවසන පරිදි රසදිය මට්ටම කෙරෙහි විශේෂ අවධානය යොමු කළ යුතු ආලේපන සහ දියර වර්ග:
  • මේකප් ක්‍රීම් සහ දියර වර්ග
  • මොයිස්චරයිසින් ක්‍රීම් සහ දියර වර්ග
  • රෝම ඉවත් කිරීමේ ආලේපන (වැක්ස්) සහ දියර වර්ග
  • හිරු රශ්මියෙන් සම පිළිස්සීම වළක්වන ක්‍රීම් (සන් ක්‍රීම්) සහ දියර වර්ග
  • සම පැහැපත් වීම සඳහා භාවිත කරන ක්‍රීම් සහ දියර වර්ග
  • සමෙහි අඳුරු පැහැය නොපෙන්වීම සඳහා භාවිත කරන [Vanishing] ක්‍රීම් සහ දියර වර්ග

ප්‍රමිතියෙන් යුත් ක්‍රීම් සහ දියර හඳුනා ගන්නා ආකාරය

රසදියවලට අමතරව ඊයම්, ආසනික් සහ කැඩ්මියම් යන බැර ලෝහ සමෙහි ආලේප කරන ක්‍රීම් හා දියර තුළ අඩංගු වේ. එම බැර ලෝහ සඳහා ද උපරිම සීමාවන් දක්වමින් ප්‍රමිති සකස් කර ඇත. බොහෝ විට ඉන් වඩාත් හානිකර බවට වාර්තා වී ඇත්තේ රසදිය බැවින් පිළිගත් වෙළෙඳ නාමයක් සහිත නිෂ්පාදන මිල දී ගැනීම ආරක්ෂාකාරී බව පාරිභෝගික කටයුතු පිළිබඳ අධිකාරිය පෙන්වා දෙයි.
නිෂ්පාදිත දිනය, කල් ඉකුත් වීමේ දිනය, අඩංගු රසායන ද්‍රව්‍ය සහ භාවිතයට උපදෙස් ලේබලයේ අඩංගු වී ඇත්දැයි පරික්ෂා කර බැලීම එහිදී වැදගත් වේ. පිළිගත් නිෂ්පාදනවල රසදිය අඩංගු නම් ලේබලයේ 'මර්කරි'' ලෙස හෝ මර්කරි අයඩෙඩ්, අමොනියටෙඩ් මර්කරි ආදී ලෙසින් සටහන් කර ඇති බව විශේෂඥ වෛද්‍ය ශ්‍රියානි සමරවීර පෙන්වා දෙන්නීය.

ශ්‍රී ලංකාවේ නීතිය


පාරිභෝගික කටයුතු පිළිබඳ අධිකාරියේ අධ්‍යක්ෂ ජනරාල් එම්.එස්.එම් ෆවුසර්

ඡායාරූප ශීර්ෂ වැකිය,
පාරිභෝගික කටයුතු පිළිබඳ අධිකාරියේ අධ්‍යක්ෂ ජනරාල් එම්.එස්.එම් ෆවුසර්
යම් ක්‍රීම් හෝ දියර වර්ගයක උපරිම සීමාවට වඩා රසදිය අන්තර්ගත බවට අනාවරණය කර ගත්ත ද ඒවා ශ්‍රී ලංකාව පුරා විකිණීම තහනම් කිරීමට පාරිභෝගික කටයුතු පිළිබඳ අධිකාරියට නීතිමය හැකියාවක් නොමැත.
"අපිට නඩු පවරන්න පුළුවන්. ඒත් පුංචි බාධාවක් තියෙනවා. 2003 අංක 09 දරන පාරිභෝගික කටයුතු පිළිබඳ පනත යටතේ මහේස්ත්‍රත්වරයාට බලතල තියෙන්නේ ඒ අධිකරණ බල සීමාව තුළ ඇති වෙළෙඳසල්වලින් එම භාණ්ඩ ඉවත් කරන්න පමණයි. ලංකාව පුරා ම විකුණන්න තියෙන්න පුළුවන්. ඒත් එහෙම නියෝගයක් දෙන්න බෑ.'' යනුවෙන් පාරිභෝගික කටයුතු පිළිබඳ අධිකාරියේ නියෝජ්‍ය අධ්‍යක්ෂිකා සමන්තා කරුණාරත්න කියා සිටියේ ඒ සම්බන්ධයෙන් පවතින නීතිමය පසුබිම විස්තර කරමිනි.

"රැවටෙන අය සිටින තුරු රවටන අයගේ අඩුවක් නෑ"

මේ අතර පාරිභෝගික කටයුතු පිළිබඳ අධිකාරියේ අධ්‍යක්ෂ ජනරාල් එම්.එස්.එම්. ෆවුසර් පවසන්නේ රසදිය අඩංගු ක්‍රීම් සහ ආලේපන ගැන දැනුවත් කිරීම සඳහා කාන්තාවන් ඉලක්ක කර ගනිමින් දැනුවත් කිරීමේ වැඩසටහන් පාරිභෝගික කටයුතු පිළිබඳ අධිකාරිය මගින් ආරම්භ කර ඇති බවය.
"රැවටෙන අය සිටින තුරු රවටන අයගේ අඩුවක් නොවන බැවින්" ජනතාව තමන් මිල දී ගන්නා භාණ්ඩවල ප්‍රමිතිය ගැන විශේෂ අවධානයක් යොමු කළ යුතු බව ඔහු කියා සිටියේ බීබීසී සිංහල සේවය වෙත අදහස් දක්වමිනි.
''ශ්‍රී ලංකාවේ බොහෝ දෙනෙක් හිතාගෙන ඉන්නේ පාරිභෝගික කටයුතු පිළිබඳ අධිකාරිය මගින් කරන්නේ බඩුවල මිල පාලනය කියලා. ඒක එක දෙයක් විතරයි. රටේ මුල් පුරවැසියාගේ සිට අවසාන කෙනා දක්වා අපි හැමෝම පාරිභෝගිකයෝ. ගැටලුව තියෙන්නේ බොහෝ පාරිභෝගිකයෝ තමන්ට වන අසාධාරණකම් වෙනුවෙන් නැගී සිටින්නේ නැති එක. ඒ නිසා ඔබේ ගැටලු 1970 කියන දුරකතන අංකයට කතා කරල කියන්න," යනුවෙන් පාරිභෝගික කටයුතු පිළිබඳ අධිකාරියේ අධ්‍යක්ෂ ජෙනරාල්වරයා වැඩිදුරටත් පැවසීය.
  • ෂර්ලි උපුල් කුමාර
  • BBC සිංහල - කොළඹ
Powered by Blogger.